اديك سر .. خليك بعيد
****************


مشتهيه لي مرقة عصر..
لفحة سفنجة وتوب صلاة..
وجرة كحل..
يابت تعالي..ماشه وين ؟
يابت تعالي..طايره وين؟
جـايه ..جـــــــــــــايه..
يما جايه..
و أطير ..جــــــــــــــري..
الدمعة تسبق خطوتي..
غبيانة دي..جنك بكاء..
أهديك وردة..
مرة حمراء ..مرة بيضاء..ومرة لا..
وأديك سر؟ ...خليك بعيد

مشتهيه لي كم قصة احكيهن
وكت القى البنات إتلملمن
أحكي وأزيد
أحكي وأعيد...
..لما الحكي
يوصل مدا
أحكي ويغيرن..وانتشي
شي من حقيقة..
ومن خيال كمين و شي
أديك سر؟ ...خليك بعيد

مشتهيه لي صحية الدغش ..
والناس نيام
تطل علي نسمة خريف
صارا لي منك سلام..
صاراو شــــــــــــــديد..
في حزتا ..تطرب تزغرد..
حلة حلة .. وحارة حارة
وشفع الجيران يمرقو
لابسين جديد..
يمرقو ما يفضل نفر
خالتي سيدة تلقي مريم
يتقالدن ..بعد قطيعه..وحورب عنيد
و أديك سر؟ ..خليك بعيد

مشتهيه لي لمة حريم ..وبنات كتار
في ضل ضحى
راكوبة في بيتنا الكبير الفي الدويم
جبنه و بخور..فنجان يدور
أول بكر ..تاني التني ..
يابت كفاك
يرمو الودع..
أخدر طويل..
يابت وليد الصرة جاك ..
أديك سر؟ .. خليك بعيد

مشتهيه لي حوليه في فسحتنا ديك
حلقة ذكر ..الله.. الله حي
يــــــــا الله حي
رايات ورق ..صاجات و طار..
والنوبه اييك
الله ..الله ..
مجانين يا شيخ العرب..مجانين
الله ..الله..
يا شيخنا هوى.. مجانين..
يا سيدنا البدوي .. مجانين
أجساد تميل.. أرواح تميل
الله .. الله..
وقلوب تميل..
الله ..
والناس تغـــــــيب..
الله
يالله صلي على الحبيب
الله ..الله..
القلوب تغرق تذوب..
ترهف تهش..
والوجوه تصفى و تبش
الله ..الله
في حزتا.. بتخيلك ..
في كل نبضة قلب دق و ارتعش
في كل وش..
في كل شي..
و أديك سر؟ .. خليك بعيد

ما تستجيب لى دمعة خاينة .. إتمردت
ما تراعي لي زفرات وجع .. إتجددت
بس تأكد روحي ترتاح تحتويك و تهدهدك ..
وعيون تساهر تحرسك..
تتوسد الشقاء والسهاد .. بس تسعدك ..
أديك سر؟ ...خليك بعــــيد