أقسي لحظة تمر علي
لما انت تكون مسافر ..
تبقي هي المر الحقيقة ..
وبحسب الزمن البعدي بينا بالثانية والدقيقة ..
***
ويوم تقول داير تسافر
بستف الحب بين ملابسك ..
شان يلامســك،،،
كل هدماً ترتديهو..
تلاقي فيهو
قليبي حارسك ..
ولما تهدأ فوق وسادتك
تلقي روحي ملت جوانحك ..
ولما تغمض رمش عينيك
أبقي في نومك أزاحمك،،،
ولما تبقي امام مرايتـك
تلقي صورتي كست ملامحك،،
وكل موقف من مواقفك
أبقي قــدرك ..
وأبقي فيهو أنا البشابهك
ولما تمرق لي صحابك
وكل زول بشوق يسالمك ..
تلقي في إيديهو إيـدي
ولمحة من عينيّ تصابحـك ..
حتي في نغمة كلامو
تلقي صوتي مزج سلامو
وتحس بي ،، أنا البصافحــك ..
***
وين تسافر مني تمشي
وين تقبل مني تبــري
ياني فيك أنا امتزجت
بمزج النفس البيطلع
مرة شهقة .. ومرة زفرة
اكون الدم في عروقك
وامشي في شريانك ابري
مسلك الحب في وريدك
فيه بغرق ومنه بروي
ياني ندك... وليك نديدك
عنك أكتب ومنك أقرأ ..
***
وإلتزاماَ بالقضية
والتمسك بالمبادي
والمبادي هي الحقيقة
والحقيقة العندي هي
لا مساومة لا مساومة
في المقاومة
بي مداومــة
والتزاما حق تماماَ
أنا البريدك
انا البريدك
وين بتمشي بلايا درباَ
وكل درباَ تمشي فيه ..
لي بيودي
وكل حدود الدنيا عندك
هي حـــدي
وين ما قبلت تلقي
إنك إنت مني ليّ
وإنك .. إنت
كل مــا عنــــدي ..